世貿會議曲終人散，但仍有新聞跟尾，八方聽聞，地鐵行政總裁周松崗最近去信有線電視，讚佢哋喺MC6會議期間直播誇啦啦，特別係星期六韓農衝擊警隊防線當日，地鐵就係通過有線畫面，睇到整個過程，決定點樣調動人手以至關站。
八方相信唔止地鐵要睇有線，連煲呔、肥龍以至一哥都要睇，聽講港澳辦都有Cable，所以對香港事瞭如指掌。
八方問有線副總裁趙應春乜咁威，佢笑話應該係部署得好，班手足齊心。佢哋當自己係示威者去諗，如果要衝出重圍，會喺邊度埋手，於是當日化整為零，實行守株待兔，結果中正。
當然啲攝影機裝晒無線發射器，就更發揮現場效果，啲片全部都冇刪剪，見乜影乜放乜，真係一次電視新聞大突破。
順便講多句，有線一月會重組，變成三間有限公司，分別係新聞、體育同娛樂，而財經資訊台亦打正招牌。當然有人升官啦，第一個係馮德雄，由副總監升正，真係值得恭喜。
傳真︰2623-9278
電郵︰[email protected]