聖誕過後，喺05年最後3日，港股日日跌，總共唔見307點。昨日恒指散169點，火種係中移動（941），冇咗1元，佔恒指跌幅63點。國指冇計中移動，跌幅輕微。紅指有計中移動，跌幅又大過國指，但冇恒指跌得咁多。
冠軍公司輪354：看通（1059）先幾日郁完之後，昨日回落5%，輪到母公司冠軍（092）異動。冠軍下晝開市時段由前市1.13元，做個幾鐘頭嘢，殺上1.20元，有近10球成交。冠軍係惡股，長期低PE，長期較NAV有大折讓，失驚無神變化非常少有。
冠軍公司輪354，跟住正股上去，由1仙上到1.8仙，升幅80%做咗是日輪王，有7球幾易手，有8萬幾銀掟落去玩死亡遊戲。隻輪下月中夠鐘，行使價1.38元，如果到時正股高過1.38元，吸引窩輪主人行使認股權利，冠軍可以集資3.20億元。唔知是否呢個原因，正股炒上。不過，如果真係睇好冠軍，直接買正股好過。炒隻咁價外嘅公司輪，如同打冇把握嘅仗，無謂搞。
地鐵C輪3459：地鐵（066）跟埋其他地產股一齊跌，收15.25元，唔見0.35元。隻C輪3459慘矣，由28仙碌落9仙，大散68%。隻輪下月16日最後買賣，剩番10日交易，救唔救得番，要睇正股上唔上到15.38元行使價以上。隻輪6月發行，發行價78仙，𠵱家跌咗9成，當時至今，地鐵仍然由14.10元升到15.25元。弊在發行時有唔低嘅溢價，𠵱家溢價就快冇晒，輪價冇法子唔散。不過隻輪唔算死得人多，因為街貨4.9%，得1.5球。
章盛