你一句佢一句 熱爆05政壇 - 李八方
今年真係多驚喜，年頭老董查找不足後，忽然話誓要杜絕官商勾結，大家以為佢食錯藥，果然冇耐，就傳出重大好消息，佢以腳痛為理由，好遺憾地下台，董太睇唔過眼老公被迫講大話，踢爆佢其實fit過鐵人楊傳廣。七年浩劫，原來好多人都揞住良心講嘢，包括成日唱好地產市道嘅賭王何鴻燊，真係滑稽咯。
煲呔以港英餘孽身份獲北京青睞，呢位推銷員以為不再孤單，可惜佢同肥龍推出嘅鳥籠民主方案不為港人接受，連陳主教同見步行步嘅陳四萬都走出嚟，肥龍見難挽狂瀾，就出到以後可能唔夠腳打牌嚟嚇港人，北京嘅許崇德重話陳太紅杏出牆，噏得就噏。詩姐姐隨住老董歸去，煲呔搵黃仁龍接任，本來係美事，但係唐唐竟然話位新同僚出身低微，你話咁嘅團隊，點強政勵治？
傳真︰2623-9278
電郵︰[email protected]
「特首個八萬五迫到我講咗七年大話。」
董建華下台後，地產建設商會會長何鴻燊自揭說了七年謊話，年年都揞住良心說樓市就快好番。
2005/6/17
「董生重鐵過楊傳廣，我哋打唔冧！」
董太在丈夫自稱腳痛請辭後在飛機上接受記者訪問，突然振臂一呼，豪言壯語衝口而出。
2005/3/17
「她要一枝紅杏出牆來。」
四大護法之一許崇德竟然口出惡言，以紅杏出牆形容陳太上街爭民主。
2005/12/19
「如果你去遊行就爭取到普選，呢個叫暴民政治。」
合和主席胡應湘在外國記者會批評港人為政改上街。
2005/11/22
「你咁樣打落去，打打吓到時候夠唔夠腳就唔知道啦。」
許仕仁以打牌作比喻，揶揄泛民要普選時間表，就好似有三番唔食，係要食三辣，搞到成日摸和，以後冇人肯打。
2005/11/29
「政府唔應該帶爭取普選嘅巿民遊花園。」
陳日君主教一語道破政改方案搵笨，在十二月四日大遊行前夕，主教再次叫煲呔勿再欺騙港人。
2005/12/3
「（我曾經係）為生活而奔波嘅推銷員。」
煲呔在宣布參選新的特首時盡訴心中情，希望贏得港人信任，不再是孤單推銷員，有千千萬萬人同佢一齊上路同行，果然12.4有千千萬萬人上街。
2005/6/2
「重有好多人都係出身低微。」
唐英年踢爆梁愛詩繼任人是黃仁龍，說他是好好的香港故事，但卻踩了人家一腳。
2005/10/8
「見一步，行一步，我冇任何政治野心。」
陳太首次上街為爭取民主遊行，被問及會否重返政壇，她說見步行步，這幾個字令曾蔭權一頭煙。
2005/12/4