一般人可能覺得索女Model只懂恃靚行兇，叻到極最多咪識擺多啲Pose！不過今日《IT人語》訪問嘅王穎，偏偏不甘於賣樣，就算早幾年已經接Job接到手軟，都要搵啲手藝充實吓自己。繼苦練化妝技巧有成後，近年重玩埋「戀相狂」，對攝影世界瘋狂迷戀！最難得者，係學師冇幾耐已經撚得一手正相，重要連合作開嘅攝影師都話Surprise！
記者、攝影：梁瑋瑜
部份相片由王穎提供
換相機為化妝
王穎做Model做咗好多年，以前一直都會帶住部Nikon機仔（編按：應是CP5400及CP880），影吓身邊唔同嘅人同事，又或閒時玩自拍過吓癮。後來開始對化妝產生興趣，閒時幫人化妝都會用DC影低自己嘅傑作，不過漸漸發覺用機仔影出嚟嘅相細緻度唔夠，唔可以好清楚咁睇番化妝後嘅效果，後尾向身邊攝影師朋友請教，於是買咗人生第一部可以全手動調校光圈快門嘅KMZ5。「其實初初真係唔知光圈快門係乜嚟，只覺得係大堆數字，學嘅過程都係拎住部Z5，試吓唔同光圈快門組合，睇吓出嚟效果係點，慢慢就開始掌握到。」
王穎覺得影相係ForFun，佢特別鍾意影女仔喊，有一次約咗個Model影相，不過個Model喊極都喊唔出，最後王穎自己坐咗喺度喊，Model睇住佢咁，彷彿受到感染，最終都喊得出，呢個經歷都可算係十分之難忘！
做過Model有利攞位
王穎初學影相時，雖然都少不免向相熟攝影師討教，不過更多時都係自己一手一腳去學，樣樣嘢都係自己試番嚟。「啲人問我睇乜嘢雜誌學影相，其實我最鍾意睇《VOGUE》，喺時裝雜誌裏面去學構圖、光暗，加上自己做過Model，都會知道點攞角度、點擺Pose出嚟效果最好，有咩姿勢會令Model覺得難為情或唔舒服，而且大家同為女仔，對方拍照會更Open，相片效果更為自然同「放」。
買齊架生使萬幾蚊
王穎今年重本買咗部Canon20D，加埋鏡頭、配件同iPod抄相，大大話話都使咗萬幾蚊，業餘攝影師嚟講已算幾發燒㗎喇！除數碼相機外，亦鍾情於菲林機，久不久就會拎部135mm機仔出街玩，好鬼有攝影師風範。
想睇多啲王穎嘅高水準作品，可以登入以下網址：
http://www.fotop.net/wongwing
攝影師眼中的王穎
鏡頭運用未夠精
拍攝王穎已無數次，對她做Model有幾專業不講了，反而對她投懷攝影有點感想；從一竅不通到明白基本原理，看着她的作品進步神速，那種驚喜實在不少，比很多拍友更有Sense。唯一問題是鏡頭運用未能掌握，一支Zoom鏡走天涯，不懂利用定焦鏡之感染力。
身材最先吸引我
認識王穎已很久，起初找她影相全是出於她的豐滿身形！合作過發覺到她十分專業，拍攝比堅尼及性感姿勢都很自然，令相片充滿美感！至於她的作品，能表現到女攝影師那種獨特觸覺，比很多男攝影師那些大路作品更吸引。
人物攝影掌握好
雖跟王穎合作不算多，不過卻是認識之Model中，少有「畀到戲」之一個，不論報紙雜誌拍照，就算商業式廣告硬照，均能貼近攝影師要求，順順利利令全組人都可以好快收工！看過她的作品，發覺王穎對人物攝影掌握較好，可能女仔對女仔關係吧。而SnapShot那些構圖OK，但感覺就較為花巧同刻意，失去隨拍之神髓。
王穎小傳
少有紅足幾年嘅Model，影過數不清嘅報章同雜誌，較出名嘅電視CM有花王沐浴乳、李健駕駛學院、優之良品等廣告，可算Model界中嘅廣告天后！電影《新紮師妹》片首更以女警扮相登場呢。近年王穎積極向學，除苦練化妝技巧外，攝影可算佔據她最多的時間，短短日子，已令身邊資深攝影師豎指大讚，而且網上相簿嘅Fans數量，絕對可媲美做Model時嘅Fans！
