仙姐向後輩教路，若然想喺粵劇界出人頭地，最緊要唔好似佢。八方唔係講反話，仙姐真係咁講，唔信嘅話，大家不妨留意吓聽晚七點喺翡翠台播出嘅《傑出華人系列──白雪仙》。
港台最近幫仙姐製作咗一個一小時嘅特輯，喺節目裏面，仙姐剖白咗對學生嘅期望。佢話，希望徒兒都能夠青出於藍，喺粵劇造詣方面更上層樓。仙姐同徒弟講過佢嘅期望，就係千萬唔好話想似佢同任姐，因為每個人都有自己嘅潛力，仙姐演戲時，從來都冇想過要似邊個人，別人嘅長處，應該吸收之後加以消化。
梅蘭芳曾經講過：「學我則生，似我則死。」所以仙姐經常告誡愛徒，似佢同任姐唔一定好。呢個節目嘅導演蔡貞停特別邀請咗仙姐返廣州攝錄，重遊舊居，仙姐迷可以一邊聽偶像講故事，一邊觀賞吓一代名伶嘅搖籃。
爆料熱線：29290000、27860099
報料傳真：26239278
報料電郵：[email protected]