政改方案玩一日就收檔，但唔代表故事就此完結。達仔（圖）噚日同八方講，話一日內先後收到三個傳媒查詢電話，問佢係咪喺二十一號晚，即係政改方案被否決之夜，親自打過電話畀煲呔向佢道歉喎。
達仔聽到梗係紮紮跳話冇啦，佢話由否決之日起，冇打過電話或見過煲呔，佢覺得有人亂放料分化民主派。達仔綜合三個傳媒「證供」後，得出嘅古仔就係：一個屬對方陣營、身在北京嘅行會成員，向傳媒放風指香港某政黨主席於二十一號晚打過電話畀煲呔耍冧，非常樣衰。
達仔對號入座之餘（因為冇其他黨主席適用），重將棠哥當頭號嫌疑犯，因為鄭人大正喺北京列席人大常委會會議，達仔好希望棠哥可以盡快澄清，話唔係佢放料嘅，因為達仔覺得，如果一個堂堂工聯會大佬要咁做去抹黑佢，就好離譜、好低莊喎。
爆料熱線：29290000、27860099
報料傳真：26239278
報料電郵：[email protected]