現年二十三歲嘅衞蘭（Janice），今年人氣爆燈，唱功了得，加上甜美嘅面孔，一加入樂壇就成為新寵，除咗唱片銷情理想外，重密密接拍廣告。原來呢位黎明最睇好嘅師妹，喺四年前已經喺林海峰（阿Jan）推出嘅《林狗十大傑青》唱片入面亮相。
阿Jan攞電話號碼
喺《林》碟附送嘅VCD入面，收錄咗一首由恭碩良作嘅《伴我同行》一曲，Janice負責唱和音，當時佢未正式出道，鬼妹仔性格嘅Janice伸脷時嘅脷環更是清晰可見。喺VCD片段入面，可以見到Janice喺錄音室嘅表現收放自如，佢除咗幫阿Janrap英文歌詞同做和音外，之後重幫阿Jan做咗個訪問。
阿Jan訪問Janice嘅時候，發揮佢一貫搞笑嘅本色，首先Janice自我介紹，Janice話：「我係Janice，可以叫我Jan，我好鍾意唱歌同跳舞。」阿Jan之後就打蛇隨棍上，問Janice平時鍾意去邊度玩、又問佢攞電話號碼、重叫佢伸埋條脷出嚟，搞到Janice鬼咁尷尬。
