上個禮拜三八方去睇立法會政改投票順道去文華飲hightea，今個禮拜三文華已經落閘鎖門。呢間位於中環最核心嘅英資酒店，見證咗香港政經風雲無數，今次改建，要八個月後至局部重開，最令人沮喪係文華會拆咗啲露台改用玻璃幕牆，呢個改法，八方所有建築界老友都擰晒頭。好彩大部份餐廳將來都會保留，只係冇咗Vong。班中環人捱八個月又有好去處。
發叔：好失落
好似行政會，佢哋打從鄧蓮如大姐年代，已經習慣每個月搵一日喺文華請食飯，唔止係行會成員，重每次請一啲人嚟交流吓意見。但食埋今個月初嗰次，下個月要移師去麗嘉，至於將來文華重開會唔會返過去就到時至知。
除咗行會，兩位發叔都要搬竇。第一位係黃宏發，記得佢做立法會議員時，最鍾意閃去文華地庫間吧飲酒，飲到面紅紅，問佢乜都講。另一位新界王劉皇發，就成日去二樓飲下午茶，重請埋記者一齊去。八方問佢文華閂咗門點算，佢就話𠵱家「好失落」。
最失落睇怕唔係劉皇發，而係梁家傑。話說傑哥五年前去驗眼，發現老花，個醫生嚇佢話再唔運動會老得好快，於是傑哥就的起心肝日日游水。佢間律師樓喺太子行，最方便係入文華個club，七點收工之後行過去游半粒鐘，已經成為習慣。不過，今個禮拜一佢游埋最後一次，就幾有「水」都冇水游啦。
花旗會所試游
八方建議傑哥要保持運動，但年紀咁上下唔好跑步打波咁激烈，不如搵過間酒店入會繼續游。佢話自己都係咁諗，但四季唔開放畀外人，金鐘嗰幾間泳池又喺室外，天冷時凍。佢噚日去過花旗銀行中心一間會所睇過，今日有時間會試吓水，如果啱就入會游住先。
一間酒店裝修停業，估唔到引起咁多人「不便」，文華都算威水。其實八方自己都好不便，因為平時冇料填滿呢個框框，只要去文華咖啡室坐一陣，肯定撞到三五個熟人，聽到七八條消息，就算隔住塊玻璃睇啲貴人喺外面行過，都好易搵到一兩隻古仔，𠵱家惟有望佢快啲復業啦。
爆料熱線：29290000、27860099
報料傳真：26239278
報料電郵：[email protected]