眨吓眼又放完聖誕假，股市開埋今日，05年就告一段落。年尾除咗有輕微粉飾櫥窗，個市一般會好靜，芬佬放晒假也。趁市靜，正好計計數檢討得失。
呢一年散戶好難搵食，雖然年尾領匯（823）畀大家食鋪三番，但以抽新股計都好高風險。大家重記唔記得有明星效應嗰隻IT（999），3月4號掛牌至今，跌咗四成七！記得佢1.95元招股，當時猛sell零售概念，又話有自由行又話有迪士尼，結果超額成千倍，勢估唔到咁失禮。
有資深股民話佢從來唔申請新股，費事戥人高興，真係好股就分雞碎咁多畀你，升都冇意思；如果分得多嘅，可能一掛牌就潛水。至於IT，佢話三四月時零售股已經水尾，當時已睇到收租股升，咁你話商場商舖大幅加租，做零售者邊有運行？