期指結算日大市表現反覆，升過50點，亦跌過73點，恒指收15045，跌55點，成交增至173億元。1月期指收15090，高水45點；上升股（不計認股證）有350多隻，比下跌股280隻為多，今日係05年最後1個交易日，唔排除有心人會繼續粉飾櫥窗。
建設銀行（939）噚日成出2.70元，創出上市後的新高價，收2.675元，升5仙，成交3.55億股，大行買賣繼續角力，但大部份時間都係買家主動掃貨。臨近收市時，2.675元「些那」原本逾100球，但掃咗50多球，掃貨者九成九係大行同基金，佢哋繼續大手收集，睇幾多？家吓大行多看好建行前景，最樂觀係雷曼兄弟，12個月目標價係3.38元。
建行上市後，升勢有如慢火煎魚，家吓2.675元，比招股價2.35元，升幅13.8%。年中上市的交通銀行（3328），噚日收3.525元，比招股價2.50元，升幅41%。建行同交銀相比，升幅遠遠落後；基金大手掃建行，博日後建行股價升幅追貼交行，已好和味。
PE較交行低
另外，建行PE比交行低，日後股價上升的空間亦較大。睇番建行盤數，05年（12月年結）上半年，盈利283.5億元人民幣，升17%，招股預測全年盈利不少於420億元人民幣，每股加權盈利0.20港元，預測PE13.3倍。交行預測每股盈利0.183元，預測PE19.2倍。以PE計，建行好吸引。
交行有滙控（005）做策略股東，持有19.9%權益；建行亦有國際級投資銀行入股，佢哋重會派員協助業務推廣同提供技術支援。美國銀行現時持有建行191.32億股，佔發行股數8.52%，並有權向大股東增持至19.9%：新加坡淡馬錫則持有132.07億股，佔5.87%。建行「晒士」大，以總資產計算，全球排第35位；以市值計，香港銀行股僅次於滙控。
建行現時在2.625元至2.675元水平整固，若升破阻力（收市計），初步上升目標係2.85元，中線可見3.20元（比招股價升幅亦只係36%）。吼建行C輪，最抵買係2107，06年6月到期，行使價2.60元，溢價5.6%，槓桿率11.8倍；建行若破位上，2107短期可見0.30元。
郭兆誠