有36年歷史嘅Hyatt九龍凱悅酒店，見證咗尖沙嘴嘅轉變，做埋明日就結業，一月尾開始拆，除咗Hugo's餐廳同啲古董外，其餘全部都冇得留低，包括頂樓房號1700（下圖）、日租過萬嘅「大班房」（TaiPanSuite）。
講開呢間「大班房」，都好有歷史同文化。話說名作家JamesClavell係60年代早期旅居香港，佢嘅第二部小說《大班》（Tai-Pan），就係以香港為故事背景；JamesClavell住過呢間3千呎、有兩房兩廳嘅套房，酒店靈機一觸，就用咗佢本大作為間房命名，就係咁一直用咗36年。
話番轉頭，「大班房」最後一個房客係澳洲律師BarryTaylor，佢同華華講，佢嚟過香港好多次，幾乎住勻全港5星級酒店，惟獨未住過九龍凱悅，所以早喺8月份計劃同屋企人來港度假兩個星期時，見酒店喺年尾結業，所以咪湊吓熱鬧，咁就無意中做咗間「大班房」最後一個房客。
雖則Barry第一次亦係最後一次入住凱悅，但佢對呢間酒店都好有感情，皆因以前經常到Hugo's食扒，又喺中餐廳食乳豬同燉木瓜，重成日幫襯樓下嘅裁縫同珠寶店。
至於佢太太就最滿意員工嘅服務，又話第日如果酒店重開，會再次幫襯咁話。不過係都有排等囉。
李華華
