十二月二十三日，《文匯報》A2版頭頂有一個橫條大廣告：「貿易通聲明，有人話貿易通明年電子報關服務冇得做，講笑？貿易通剛剛上市，又怎會明年冇得做？」廣告冇署名，但有一個貿易通Tradelink嘅標誌。
此廣告值得注意之處，有兩點。第一就係左丁山一日睇好多報紙，在其他報紙見唔到呢個廣告，莫非眼花？還是廣告在《文匯報》刊登於特別顯著位置？第二就係廣告文字，半廣東話，半白話，甚罕見，照計上市公司登廣告，澄清謠言，行文應該比較嚴肅、正規，唔會好似左丁山寫專欄咁噃？貿易通究竟搞乜東東？
貿易通由政府控制，情況與地鐵相同，全港出入口商進口出口都要報關，現在統一用晒電腦，貿易通係獨市生意，只要能夠控制成本，穩賺不賠。呢隻股票可以諗吓㗎，不過增長率就唔會好高，除非貿易通加價啦。
出入口報關全部電子化，不經不覺，冇人抗議，冇人反對，不是新聞。但根據碼頭業務人士講，貨櫃碼頭嘅貨櫃箱，內有乜嘢貨物，由邊度付運，去甚麼目的地，最後收貨人與真正付貨人及貨運代理名稱，一樣要申報。香港碼頭好落後，過去用人手填報，不久前先至有兩個系統做parallelrun，人手與電子報關一齊嚟，任揀。付貨人多用電腦，貨櫃車司機用人手，於是各方面都唔滿意。先進派話新加坡老早完全碼頭電子化，中國上海、深圳後發先至，快將完成貨櫃報關電子化，點解曾有世界第一大港（今已不保）之稱嘅香港，貨櫃報關重係咁落後？本港碼頭及貨櫃車運輸成本已經高過人，貨櫃報關制度落後，成本亦貴過人！保守派就話貨櫃車司機唔熟電腦，唔想畀多啲電腦處理費用喎！咁政府點解唔效法新加坡、深圳，明令通行碼頭電子報關呀？據知理由十分簡單，就係政府透過貿易通向出入口商收費就得，碼頭搞貨櫃電子報關，就最好同貨櫃車行業傾掂先喎！