今日係2005年最後一個交易日，小初噚日同經紀黃喺度盤算緊有乜嘢股票會粉飾櫥窗mark高收市，傾完一輪後，覺得個別芬佬揸重嘅二三線股最有機會，但係邊幾隻就唔方便直講，都係由大家估吓啦。
今年可列為新股之最的富力地產（2777），早排遇上廣州打擊炒樓徵收兩成所得稅影響，股價一度質落25元以下，但三扒兩撥又升番上嚟。經紀黃話，雖然富力喺廣州起家，但近年業務已經發展至天津及北京，重話下個星期帶傳媒上去睇吓。
富力堪稱本年度表現最佳的IPO之一，上市之初相當靜，但因為芬佬坐晒貨，所以愈升愈有，上市不過5個月多啲，已由招股時的10.80元，升至27元水平。由於隻股要到下個月中先至上市夠半年，就算想趁高價批股，家陣都重未得住，短期仍看好。
富力昨日升0.735％，收27.40元，成交股數84.2萬股，成交金額2300萬元。
慕容小初