風水輪流轉，回歸前香港永遠跑贏澳門幾條街，因為英國佬管治殖民地叻過葡萄牙人好多。不過，回歸祖國後，兩地換咗領導，形勢就逆轉，連本港小六學生聽到澳門準備喺○九年推行十五年免費教育，都嚷住要搬去做澳門人，可見鏵哥幾得民心。
溫總都識貨，佢噚日見嚟述職嘅澳門鏵，就讚佢搞義務教育了不起。政府大把錢，用番喺市民身上，實在係德政同有魄力。
鏵哥點頂瓜瓜都只可以做兩任，即係○九年要下台，澳門唔知去邊度搵得番個咁醒嘅領導，當然澳門做細嘅係好命啲，乜都阿哥行先，好嘅如CEPA就照跟，唔好嘅好似《基本法》香港居留權嘅有關規定就唔照抄，所以澳門唔使人大釋法。
至於今次政改之爭，鏵哥又話學到嘢，就係最後要由澳門人決定想要乜，接受結果，呢兩句話真係可圈可點，煲呔到𠵱家都唔知明唔明。
爆料熱線：29290000、27860099
報料傳真：26239278
報料電郵：[email protected]