一年一度嘅香港藝術節喺明年二月過新年嗰陣，又會開鑼，𠵱家賣緊飛，藝術節搞吓搞吓都搞咗三十幾年，呢個節都係政府貼錢畀有錢佬睇鬼佬大戲，執人哋口水尾嗰隻。
無計啦，三十幾年前話要搞香港藝術節都係為咗要畀啲鬼佬遊客有show睇，動機唔係要發展香港嘅藝術，𠵱家自由行咁勁，遲啲一定搞啲騷畀劉華同富城嘅自由行fans睇，又係嗰啲掛住藝術嘅羊頭，賣緊遊客嘅狗肉囉，所以香港藝術節先至會搵以前香港旅遊協會嘅高層，高信禮做行政總監，係香港先至會搵搞旅遊嘅鬼佬做藝術節㗎啫，一個高級娛樂藝術節囉。
林懷民舞曲值得欣賞
𠵱家香港藝術節換咗阿李業廣做主席，都係要搵番個啱key嘅手下至得，高先生呢啲點會合自由行客嘅口味，其實政府使鬼畀咁多錢搞香港藝術節咩，最好就係搞嗰啲拉斯維加斯大show，橫掂𠵱家香港又無戲開，出碟又無人買，實行搞多啲明星真人表演啦，阿廣叔咁醒目，一定支持嘅。
講開又講，阿肥龍坐喺藝術節個節目委員會好多年，肥龍係高級鬼佬大戲發燒友係人都知，啲口味都係鬼鬼哋嗰隻，唔知𠵱家肥龍走咗，會唔會有好大影響？今年都有啲節目好好睇㗎，好似阿林懷民個行草三部曲同比利時羅剎Rosas都好難喺香港有得睇，其他啲節目就差唔多呢，今年唔睇，明年都有得睇，嘻嘻。