聖誕節假期，見到細路豪流鼻水，成個傷風模樣，問佢點解咁水皮呀，天氣寒冷時，着少件衫呀？佢話放假前被同學傳染嘅，好多同學染上傷風。
照計𠵱家啲父母痛惜細路，做埋跟班咁滯，冇理由會畀自己仔女冷親嘅啫。後來碰到教師Ｖ，佢話現在啲中小學生，唔興穿着厚校褸，只鍾意着一件單薄毛衣冚住件白恤衫返學，天氣一凍，好容易冷親。左丁山讀書年代，唔着校褸會俾班主任責備，俾校長罰企嘅噃，學生點敢唔着校褸？教師Ｖ話：「現在邊度敢罰學生呀，一千個學生有五個唔着校褸，就話罰啫，一千個學生之中有九百八十人唔着，點罰喎，你估校長係李一哥，當啲學生係韓農，拉晒佢哋呀？現在冇得理㗎嘞，當睇唔到，我哋教師費事煩。我一個朋友喺沙田一間中學教書，佢哋索性取消校褸，俾學生着有毛裡風褸返學，聽講學生好歡迎，認為有型喎。」
惡佬明在地盤惡慣，返到屋企，對兩個仔冇晒符，佢哋就係唔肯着厚厚嘅麻包絨校褸返學，認為又重又老套兼夾cheap，情願日日流鼻涕返學，惡佬明冇計之餘，唯有叫佢哋着長袖羊毛底衫打底，外穿恤衫；咦，咁樣，有型有款，女同學睇唔到內有「虧佬衫」喎，掂晒。大編輯聽見惡佬明咁苦心，為之服晒。
大編輯話：「一件麻包絨校褸，每季只着一次返學校影全班相片，未免浪費，都係香港下一代唔知銀紙矜貴之過。想當年，我哋校長勸中七班學生離校畢業時，捐件校褸出嚟畀師弟着。我升上中六，舊校褸已經唔啱身，阿媽冇錢買件新嘅，就申請獲派一件中七生嘅舊校褸，着足兩年，唔知幾感激捐校褸嘅師兄。想唔到現在啲中小學生視校褸如廢物也。」
校褸款式，用料，五十年不變，新一代不感興趣，學校亦無法堅持傳統，除非係嗰幾間名校啦。表妹Ｙ拎張家庭相片出嚟，幾位家長睇到嘩嘩聲，不勝羨慕，因為相片內五位小女孩都係着白色校服裙打粉紅或粉藍色校呔！