年近歲晚，房屋及規劃地政局署理常秘兼房署署理署長譚榮邦，噚日請傳媒食飯，回顧房署過去一年嘅得失。譚常秘一開始就連講房署七樣好嘢，包括贏租金官司、領匯成功上市、處理居屋貨尾單位、推出紓緩擠迫戶措施、實行全方位維修計劃等等。頭兩樣令房委會保住唔使負資產，尾幾項就係紓解民困措施，絕大部份公屋居民都可以受惠。
譚常秘都好公平，講完好嘢就即刻講過去一年嘅衰嘢，好似連續唔知幾多年成為被投訴最多嘅政府部門、外判工人成日被承辦商剋扣薪金福利、公屋空置同欠租率偏高，同埋接二連三發生高空擲物事件。佢好堅決咁話，房署未來一年主要工作係要將所有衰嘢趕走，誓要成為最多市民鍾意嘅部門喎。
譚榮邦又提及前上司梁展文，佢話CM梁早前因為嘉亨灣單嘢成日被人鬧，譚榮邦噚日就大讚CM喺房署工作好好，傳媒唔應該只報道CM負面嘢喎。咁又係，CM做咗咁耐官，冇功都有勞，希望佢退休快樂啦。
爆料熱線：29290000、27860099
報料傳真：26239278
報料電郵：[email protected]