韓國男星池珍熙早排去咗台灣宣傳電影《如果．愛》，佢自爆話未入行前係做攝影師，有次嚟香港影嘢時撞鬼，佢話：「那一次我來到香港工作，晚上有五、六隻鬼跑進房間來，要我陪他們一起玩。我嚴詞拒絕陪他們玩，後來他們就從窗戶離開了！」
池珍熙話當時住喺酒店嘅二十幾樓，根本冇可能有人從窗爬入，所以佢先估係鬼作怪。呢班嘩鬼隔咗一日又去騷擾池珍熙，不過都俾佢趕走。
池珍熙話自己都算大膽，所以唔驚鬼，但同房嘅主管就嚇到標尿。池珍熙話：「其實每個人的心裏都住着天使和魔鬼，當你想做決定時，他們就開始拉鋸和對抗。」
唔介意比較
池珍熙喺《如》片大講普通話，咁啱同鄉張東健喺電影《無極》都係講普通話對白，難免會俾人拎嚟比較，池珍熙話唔介意，佢認為只要做好份內事就得。對於Samsung相機最近有意搵張東健做代言人，池珍熙就話：「我也很奇怪，為何相機廠商都沒想到找我擔任代言人呢？」