外圍美股跌過百點，港股跟到足，恒指一度大跌134點，午後日股大升225點收市，報16194，係2000年9月以來最高，港股隨即由低位反彈，最後收15101，跌82點，成交只得135億元。
大市雖跌，但上升股（不計認股證）有280多隻，炒股唔炒市，升幅最大係MP物流（8239），收5仙，升2仙，升幅66.6%，但成交只得4680大元，冇意思。不過，有1隻新上市、未炒過嘅物流股就好值得留意，佢就係南粵物流（3399），噚日收2.90元，升1個位，但同上市價3.45元比較，重低成16%。
南粵係國企，上市剛兩個月，也只得掛牌之日平過3.45元的上市價，之後一直潛水，最低2.775元，近日由低位回升，重上10日線（2.833元），圖表亦出現入貨訊號，若升破20日線（2.928元），回升之勢便可確認，有機會重上水面。
近年業績增長迅速
南粵係廣東省交通集團屬下從事綜合物流及高速公路相關服務的旗艦公司，交通集團總資產超過1000億元（人民幣．下同），負責建設同管理廣東省內的高速公路，目前其投資及經營的高速公路約2100公里，佔廣東省總里程的83%。
南粵上市發售1.38億股，中石化（386）以發售價購入2100萬股，佔H股15.2%，1年禁售期，成為策略股東，雙方合作發展油站業務。另外，德意志銀行及IntegratedAsset分別持有1397萬股及800萬股，佔10.13%及5.8%。
南粵近3年業績增長迅速，由02年至04年，營業額及盈利的複合年增長率分別係64.5%同38.1%。上市時公布，截至05年5月止，營業額為12.68億元，盈利5135萬元，同比大增1.7倍，預測05年全年每股加權盈利0.40元，PE7.25倍，頗為吸引。
3個須披露的策略性股東同基金投資者，已持有逾31%的H股，其他未達披露水平的基金持股亦不在少數，南粵近日成交量愈縮愈小（噚日只得111萬股），貨源顯已歸晒邊，升勢可一觸即發。
郭兆誠