二人男子組合ILoveYouBoyz前晚演出搞笑舞台劇，玩盡多位娛樂圈藝人。他們除扮郭富城在《三岔口》的擘口場面外，說到娛圈性別難分的男女又暗示林一峰及何韻詩，兩人還明寸吳君如日前熱捧《如果．愛》而踩《無極》的言論。
二人男子組合ILoveYouBoyz前晚在理工大學演出《龍兄鳳弟》搞笑舞台劇，找來吳卓羲任表演嘉賓，容祖兒、何韻詩、方力申、林海峰及關智斌等都有捧場。
ILoveYouBoyz台上寸盡圈中人，成員少爺占扮郭富城在電影《三岔口》中擘大口的場面，然後說：「呢個係媽叉口嘅演繹。」另一成員Donald即說：「你扮郭富城？因住小美用媽叉口鬧你喎。」惹得全場大笑。
墮馬爆咪咪
後來他們又指娛樂圈的男女難分性別，少爺占說：「有人話嚴淑明係女人，又冇人話佢係男人，好似林一……」話未說完，Donald即扮開槍將少爺占射低，但少爺占又謂：「好似何韻……」然後又止住，矛頭直指向來被傳有同性密友的林一峰及何韻詩。
少爺占及後扮蔡慧敏胸前偉大，又扮林志玲墮馬，他說：「唉唷，我的咪咪爆咗呀。」
當他扮吳君如生仔時更大膽說：「《無極》好難睇，《如果．愛》好好睇。喂，Cable（有線電視）喺唔喺度，唔好拍住。」事後他表示純粹講笑，也沒有不讓有線拍攝。
問少爺占怕不怕得罪人，他說：「唔怕，我哋事前通知晒佢哋，我哋同小美好好朋友，城城嚟嘅話我哋咪唔玩佢囉，咁多人中只有林一峰未通知，不過佢好鍾意人哋講佢，佢會好開心㗎。我哋都諗住講Kenny（關智斌），但佢嚟咗，咪冇玩囉！」
客串唔夠皮
吳卓羲出場時扮黑幫大佬，唱了幾句泰文歌，又拿着摺櫈，但出場時間十分少，後來他更主動要求再出場客串，少爺占說：「我哋臨時度畀佢㗎，我哋都請Twins同草蜢做嘉賓，但佢哋唔得閒。」吳卓羲則說：「幾好玩，做耐啲重好，啲對白我臨時爆肚，唱泰文歌我都唔知唱乜。」
採訪：魯萍
攝影：陳慧安
