煲呔述職未返，肥龍就要頂住佢老闆個位，噚日更要代曾出征，擔任工展會開幕嘅主禮嘉賓。
雖然噚日天氣麻麻，成日重要落住毛毛細雨冷冰冰，但都冇影響肥龍嘅購物心情。事關當個儀式結束後，肥龍就喺一眾人傍住下，去到各個攤位度參觀。當佢去到唐唐家族出售靈芝嘅攤位時，情緒好似特別高漲咁，即時同鬍鬚曾以及呂明華等人試飲靈芝，飲完之後猛讚好，重買啲靈芝返屋企慢慢歎。
難得肥龍啱心水，攤檔負責人都好識做，即刻畀個九折佢，結果肥龍就花咗六百八十四蚊買咗兩樽靈芝孢子，負責人重送多兩包猴頭菇畀肥龍，都算唔話得。嗱，好多人話個攤位攞財爺作招徠有問題，人哋署理特首都唔避嫌，即係冇所謂啦。
之後肥龍去到個糖果攤位，二話不說用咗百七蚊買咗一大袋糖，重將啲糖分畀現場記者，唔通係想令人淡忘佢早前講政改方案被拉倒嗰個惡樣？
爆料熱線：29290000、27860099
報料傳真：26239278
報料電郵：[email protected]