呢排唔少紅籌股表現唔錯，股價都升至近期高位。經紀黃話，聽講一直等緊注入北京燃氣業務的北京控股（392），下個月會由一間歐資行帶領下到星洲做路演。
北控自從97年威過之後，多年來都好低調，但近幾個月又再活躍番，先有大股東以每股12.90元配售4000萬股舊股，然後又發行可轉換債券，跟住又打開口牌話注入北京燃氣，雖然幾時注入尚未落實，但連串動作顯示好事近。
經紀黃話，北控今次往星洲路演，據講會同埋北京燃氣管理層一齊去，向投資者介紹佢哋嘅大計，並以本地的中華煤氣（003）作為學習對象。
由於燃氣股如新奧燃氣（2688）同百江燃氣（1083）一直獲得投資者捧場，所以唔排除芬佬都會受落北控呢項注資，買入捧場。
北控股價近期在12元至13元水平上落，昨日收13元，冇起跌，成交股數111.4萬股，金額1430萬元。
慕容小初