地產經紀水、陸兩路甚至搭飛機去外地送定嘅事，蘭西提過唔少，不過飛到去中東國家咁遠就好少有。
美聯元朗嘉湖分行經理黎富強Ricky，就喺上個禮拜，搭凌晨班機飛咗去杜拜，幫個客送定畀長駐當地做嘢嘅外國業主。事緣佢嘅下屬張敏儀介紹名新界買家睇大坑嘉崙臺一套連租約嘅相連戶，個客亦十分鍾意，出價近四千萬兼畀埋定，Ricky見機不可失，代下屬送定，搭最快喺當晚凌晨起飛班機直奔杜拜，九個鐘去到，係當地時間凌晨四點。
由於約好業主朝早十一點簽收，於是搵間酒店稍事休息，到下晝搞掂所有手續，隨即又搭最快一班機返香港，由於凌晨一點至起飛，Ricky發揮港人把握分秒嘅特質，趁半日空檔，喺酒店附近觀光順便買埋手信，全程使費約一萬蚊，佣金收入至少有六位數字，總算不枉此行。
郵地址：[email protected]