黃宗澤一向愛狗，家中飼養了沙皮狗Kapum。拍照當日，黃宗澤特地穿上泥黃色外套，笑言要跟愛犬以父子裝上陣。原來這位「父親」家教甚嚴，愛犬一頑皮，便會出動藤條伺候，現在愛犬行行企企抑或食飯開餐，均要聽從主人指令行事。
黃宗澤自幼就養狗，尤其喜歡養中國沙皮狗，貪牠們樣子蠢蠢卻非常忠心，現在他飼養的沙皮狗公叫Kapum，黃宗澤日前說：「Kapum係喺寵物店買，覺得合眼緣就帶咗佢返屋企，Kapum係泰文，有向人問好嘅意思。」
日啖鮮牛肉
黃宗澤笑言自己名義上雖然是Kapum的主人，但其實最疼錫牠的是黃媽媽，每日定必親自下廚炮製新鮮牛肉餵飼，營養絕對豐富，令愛犬異常嘴尖，等閒狗食物已不放在眼內。
黃宗澤笑說：「我比較少時間喺屋企，變咗媽咪照顧佢，媽咪直情當佢人咁養，搞到佢𠵱家唔肯食狗糧。」
Kapum雖然饞嘴，但聽教聽話，拍照當日更即場表演，除了會聽命令又行又坐外，連食物當前牠也是定力十足，等了足足一分鐘，聽到主人命令後才敢狼吞虎嚥，非常有家教，原來與黃宗澤訓練有素有關。
黃宗澤說：「若果平日Kapum唔聽話，我都會用藤條打佢，不過就好輕力，所以佢都好乖㗎。」
嚴選新抱仔
黃宗澤表示除了沙皮狗外，還喜歡英武又忠心的德國狼狗。愛犬Kapum目前三歲多，正值壯年，故黃宗澤亦有意為牠搵老婆傳宗接代，除了要合黃宗澤眼緣外，還要狗兒雙方情投意合，黃宗澤笑說：「如果唔係，我怕佢哋未配就打起上嚟，咁就唔好啦。」
採訪：何永寧
攝影：仇志德
