今年尾3交易日，期指結算前夕，個市麻麻，恒指跌82點，但1月期指則高水74點。總成交135億元，較假前多25.8億元，炒家最後衝刺，未來兩日估計會高收。
1隻中移動（941），跌0.75元，拖低恒指47點。認為中移動會反彈番上去，可博中移動C輪9306，隻輪溢價與槓桿率都較細，贏輸冇賭其他輪咁勁。
滙控C輪4907：滙控（005）見過125元齊頭，埋單125.30元，跌0.10元，有啲C輪跌幅超過1成半，都係嗰批溢價高、槓桿率勁嘅。4907見過36仙，收38仙，只跌1格。隻輪係低溢價輪，唔易因溢價收縮而下跌，當然如果正股回落，則輪價仍然係向下。滙控睇好，4907諗得過，明年4月初到期，溢價1.2%，槓桿率33倍（有效19倍），引伸波幅12.5%。正股喺隻輪到期前，係咁意上到130元（升4.70元），隻輪值70仙。
長實C輪9056：長實（001）跌20仙，C輪9056散15%。長實收80.70元，吼住喺80元邊邊，買9056博反彈。隻輪明年2月初夠鐘，輪價25.5仙，溢價2.3%，槓桿率31.7倍（有效18.6倍），引伸波幅20.6%。留意下月24日最後買賣，時日無多。
章盛