唔忿氣，再去請教師傅種菠菜心得，誰知剛巧碰到她拿着桶雞屎回來，有朋友養雞真好！「如果遲啲中央屠宰，就要轉移執牛屎了，可惜呢度冇人養牛。」原來唔係淨係雞屎至含氮磷鉀，所有草食性動物嘅糞便都有，含量最多的是羊屎，牛屎也不弱，難怪住新界的大嚿日日去執牛屎啦！「收集回來嘅屎，還要經過融解處理，可以溝水稀釋，存放一個月，融化後再溝水施肥；又或者直接放在泥土裏，再用泥完全覆蓋着，又係等一個月，當你翻開泥土，唔見晒啲屎便可以混合其他泥耕種了。」「如果係素食者嘅人屎，又得唔得呀？」「人嘅屎就唔得，尿就得，不過都係要溝水，大約1:20啦！否則會醃死啲植物㗎！唔好亂嚟！」其實，屎屎尿尿都係有啲怕怕，我成日邊摘邊食，萬一唔小心食到啲殘餘物資咪弊！都係食師傅種出嚟嘅算喇！睇唔到當唔知囉！
（六十三）
阿花