一年年結，又係回顧嘅時候，各傳媒都選出05年10大新聞，咁大家認為財經新聞有邊10大呢？財經事務及庫務局局長馬時亨嘅心水就有建行上市、息率多次向上調整、檢討窩輪市場機制及領匯成功掛牌（見表）。
華華小人之心，發現馬局長選出嗰10大幾乎都係好嘢，並無劉金寶判死緩、沈聯濤唔撈之類新聞，同我哋傳媒人嘅標準（唔死人冧樓股災都唔做頭條）好唔同。例如局長選取消遺產稅，佢話可以推動香港成為國際資產管理中心嘅發展；領匯成功上市，又話成就咗全球最大型嘅REIT首次公開發售；貿易通掛牌上市更加係標誌政府貫徹「小政府、大市場」嘅政策咁話。睇嚟政府高層起碼有兩個推銷員，煲呔一啲都唔孤獨。
不過又好難怪佢，一個人兩條心唔係多。馬局長講到明，佢選嘅10大，都係同佢嘅工作範疇有關嘅，咁佢如果選啲衰嘢，咪即是唱衰自己？如果真係有個咁笨嘅局長管香港嘅財經事務，我哋都好驚啫。
李華華