香港主辦世貿第6次部長級會議，唔計示威同警察拉人，都算好成功。各國部長及與會人士對大會嘅殷勤招待同香港嘅效率都滿口讚賞，唔少部長重提議，畀香港繼續主辦以後嘅會議，真係「客氣」！工商及科技局局長曾俊華重講笑話會再辦多20次－佢見大家嚇到擘大個口，先至正經話：「做一次就夠啦！」
曾局長噚日接受完新城訪問後見記者，總結今次WTO，佢話成功要歸功於同事嘅準備功夫做得足，之前18個月已開始着手籌辦物流、人事、會議內容等工作，令開會期間各方面都滿意。
佢又話今次會議，能成功達成協議，以較進取嘅瑞士公式作為工業貨品遞減關稅嘅方式，若工業貨品最終關稅全免，香港將因此少付77億元；而服務業若進一步開放，更可為港商開拓更多市場；當然會議亦可提高本港嘅國際形象，總之香港就得多於失。你估李明逵同唔同意？