聖誕長假期放完，再返多3日工又放新年假，睇怕好多芬佬會索性放埋呢3日，到明年才返工，所以呢幾日大市預期會好靜。不過經紀陳話，有個別二三線股因為有嘢搞緊，估計仍然會好熱鬧。
呢排有消息嘅二三線股，計有天鷹（1129）同埋曼盛生物（512）。經紀陳話，天鷹搞緊業務轉型，股東組合稍後亦會有改變。至於曼盛就賣盤畀人，並搞緊全面收購，聽講暫時尚未正式開車，可能要收夠貨先至有大動作，現階段股價仍然會好波動。
天鷹最近話轉型賣表，跟住配售2.5億股，每股0.11元，當中有近一半貨配畀兩名董事。上周股價最高炒過上去0.195元，收0.187元，升36.5％，波幅相當大，而承配人帳面已賺大錢。
至於曼盛嘅新主就以每股7.5仙提出全購，但復牌以來股價忽上忽落，走勢十分波動，上周五升9.74%，收0.124元。
慕容小初