葉璇近期人氣爆燈，擔正主角的無綫《本草藥王》同亞視《情陷夜中環》同時出街，處女電影作《情義我心知》又喺正聖誕旺期推出，點知私生活方面重精采……不過撇開呢啲唔講，原來佢都係識食之人，今次帶小記去佢經常幫襯嘅食肆，鴨胸龍蝦燕窩樣樣齊，怪唔得keep得咁省鏡啦！
記者：陳慧茵
攝影：林栢鈞
服裝提供：DianevonFurstenberg
星光大道擦海鮮
早前傳葉璇同張文慈不和，與《夜中環上海》同劇的李思蓓、梁敏儀三個撐枱腳飛起張文慈，出事現場就係BluesbytheBay。自言係呢度熟客嘅葉璇經常帶朋友嚟開餐，最愛海鮮拼盤，至於點解識喺星光大道搵食，原來店舖老闆就係佢老友。
咖喱肉蟹$298
選用肉質鮮美豐腴的美國肉蟹，泰式唔太辣，light咖喱味超香濃，同行識飲識食嘅攝記都話天下無敵。
海鮮拼盤$480
鎮店之寶的海鮮拼盤係葉璇最愛，其他新鮮配料包括澳洲生蠔、阿拉斯加蟹腳、翡翠螺、鮑魚仔、青口等，全部新鮮揀手，當日被偷拍三女亦有品嘗！
玫瑰天婦羅$78
嫌送花無新意？不如帶女朋友嚟食花啦！將玫瑰花瓣、香葉、鍋粑等炸成天婦羅，食時蘸點混入花生的泰式酸辣醬，惹味玫瑰食落肚暖胃，好過買嚟齋睇。
食客即評
BluesbytheBay（27393366）
地址：尖沙嘴梳士巴利道18-24號新世界中心地下L012B舖
食住瞓都揀珀麗
葉璇對珀麗酒店情有獨鍾，主持50集《夜來女人香》全部喺珀麗酒店心軒中菜廳取景，拍完最鍾意同四哥等齊齊落嚟醫肚，連帶男朋友見家長都係揀「心軒」，都係因為呢度嘅山珍海味、點心同龍川、普洱茶吸引啫！聽聞章子怡同呂珊都係常客㖭！
石燒醬燒骨$98
知道葉璇怕豬肉嘅腥味，師傅特別以泰國雞醬及蜜糖煮成醬汁，酸甜醒胃，加上以石燒鍋上，使醬汁滲入排骨內，好滾熱！
西蘭花XO醬炒鴨胸$148
喺《情義我心知》無得食鴨王黎明，私底下葉璇食鴨都食得好刁鑽，遇上呢款切走部份連皮肥肉，再燜至5成熟先落鑊炒的鴨胸，葉璇都話夠晒鮮甜鬆軟。
珀麗酒店心軒（21278818）
地址：銅鑼灣信德街8號2樓
燕窩專家都話好口感
每次嚟必嗌阿翁名菜套餐，$980包括紅燒砂鍋鮑翅、30頭吉品鮑魚、鮑汁花膠鵝掌、脆皮炸子雞、杏汁燕窩等共7道菜，非常抵食。葉璇話最欣賞呢度嘅杏汁燕窩，夠足料又養顏，間中重會買嚟請客㖭！
招牌菜：鮑魚花膠扣鵝掌
日本頂級吉品鮑魚夠鮮甜、厚度十足的巴基斯坦花膠彈牙有口感、黏性強，加埋入味鵝掌，淨係汁都用去皮老雞及排骨熬足兩日，屬店舖的頂級招牌菜。
杏汁燉燕窩
以龍王大杏磨成水隔渣的杏汁清燉印尼白燕，索價過萬元一斤，同每朝工人準備的燕窩相比，葉璇話：「口感好好多！」
富豪酒家（27362228）
地址：尖沙嘴彌敦道132號美麗華商場4樓
