馮仁昭噚日收到風，話○○年一月加盟新城電台做行政總裁嘅甘國亮即將離職，老闆和黃方面到時會調一位精於睇數同計數嘅女高層過新城接替甘國亮嘅職位。
將會大換血
雖然新城近年有錢賺，但有人認為所賺數目同目標重相差好遠，所以決定甘國亮約滿後唔再同佢續約。至於嗰位女高層上任之後，會重整新城內部架構同大換血，甚至大裁員，正所謂一朝天子一朝臣，又難怪唔少新城ＤＪ同職員呢幾日都好擔心！噚日馮仁昭向甘國亮求證離職呢件事，但佢堅持等到今日先同大家交代。
身為新城一分子嘅薛家燕（好姨），噚日喺電話度就話唔知甘國亮離職：「冇人通知過我，當日係甘生搵我返新城，佢係一位好上司。甘生好照顧我，之前我哋同舟共濟一齊減人工，今年公司賺番錢，甘生之前都同我講話會分花紅。佢離開我會好唔捨得，若然係真，我會搵佢食餐飯。」
雖然新城嚟緊會大執位，但好姨地位就穩如泰山，因佢幫新城搵唔少廣告，點郁都唔會對好姨構成影響。