聖誕長假過去，跟住又到新年，唔少芬佬同股民都放假，今個禮拜3個交易日，相信市況仍會較為沉靜。
2005年股市難玩，2006年亦相信唔係咁易搵食。現時最樂觀者，對06年恒指高位嘅預測，亦只係去到17000多點，升幅只係約15%，而若如大多數大行所預期的會見16000點，亦只係升多800點而已。明年要在股市獲利，難度仍然極高。
今年港股大部份時間雖在窄幅上落，但個別類別股票有強勢表現，例如內地地產股便是。近日廣州推出打擊炒樓措施，明年開始個人轉讓房產將徵收20%個人所得稅，令內地地產股升勢窒步，但中長線而言，內地地產業仍大有可為，現時股價因利淡消息而回落，正係低吸良機。
大行看好內地地產股，立場並冇改變，中國海外（688）同華潤置地（1109）可優先選取。高盛最新研究報告仍維持中海「優於大市」評級，建議候低買入。
股價折讓達55%
中國11月生產轎車29.2萬輛，同比升52.1%，創出歷史新高，而今年1月至11月累計生產轎車265萬輛，同比升24.2%，而在產量創出新高同時，11月銷量亦有強勁增長。汽車業回醒，駿威（203）、華晨（1114）同慶鈴（1122）都已由低位回升，慶鈴係被日本五十鈴「高價」收購的股票，現時股價1.16元，相當收購價1.92元，折讓近40%；五十鈴出招不會打無把握嘅仗，現水平嘅慶鈴，有策略性持有價值。
近兩個多月來，慶鈴由低位逐級回升，經歷長達7個月的回落期，大戶收集相信已完成，短期若升破1.20元的降軌阻力，可向1.40元推進。
慶鈴往績PE雖高，但同五十鈴合作，引入先進技術及管理後，有望紓緩生產成本，前景看好，兩家美資大行都給予慶鈴「買入」投資評級，目標價1.55元。
慶鈴財況充裕，手頭有淨現金逾8億元，而到今年6月底止，每股資產淨值2.58元，股價大折讓55%。近日有消息，話公司快有大動作，若發行新股，股價折讓將會大為收窄。
郭兆誠