蘋果蘋論版喺拆禮物日有一篇文章「日本社會嚴分上下流」，作者劉黎兒（文化評論員），文章幾有趣味，但開頭幾句，收尾三句，就令人覺得作者對日本過往十五年之不景氣，冇尋求原因，重係緬懷昔日好時光，不知舊制度就係搞彎日本之制度。
劉黎兒開頭話：「主要原因是小泉擔任首相後，為了紓解一千兆日圓的財政赤字，只好採用美國流，走自由開放的小政府路線，因此貧富兩極化。」文末結語：「日本人雖想改革，卻沒想到美國流經濟模式最後會讓自己淪為下流。」
日本出現「下流社會」，有經濟原因，有社會原因，按劉黎兒嘅文意，日本不「大舉民營化、撤消保護」，日本就可以維持一九八九年以前嘅「中流」景象？用美國流（即美國方式）社會陷日本於下流境地？其實作者應該介紹吓日本重有邊條路可以走，如何先至可以解決「一千兆日圓的赤字」，係唔係日本央行繼續印銀紙就可以解決？抑或日本將入息稅稅率提升到80%，銷售稅提升到50%就可以解決？
一千兆日圓，等於幾多港紙？諗吓都得人驚，一兆等於一萬億，一千個一萬億就係一千萬億，左丁山有個中學同學叫做L萬億，我哋畀佢一個外號：十三個窿（十三個零），十三個零重要乘一千，百分之九十幾嘅計數機都爆機，左丁山粗略算一算，約等於六十六萬八千億港元。日本政府之所以負債纍纍，財赤達到天文數字，就因為過往日本公營浪費，保護衍生巨額補貼，一路累積下來，進入二十世紀九十年代地產泡沫、股市泡沫爆破之後，一沉不起十五年，再用番以前嗰套政策，日本會走上破產之路，故此非民營化，撤銷保護政策及社會主義思維不可，不走「美國流」，日本國有乜好選擇？文化評論員多數反美，不理經濟學，睇法有欠全面。
【按：昨日講到Archbishop（大主教），其實係陳日君主教（Bishop），非大主教，寫專欄玩吓啫，請勿誤會為盼！】