香港股民有90萬，本欄嘅讀者相信大多有買賣股票，或者投資基金、炒窩輪，亦肯定有唔少切身體會同付出真金白銀換取嘅經驗，有冇興趣寫個古仔呢？
話說證監可能見羊生羊太實在太多，好想教育吓廣大投資者，搞咗個故事比賽，參賽者可以寫一個故事，講吓自己投資經歷，有乜經驗？有乜嘢可供其他人借鑑？個比賽分兩組，一組係香港股票，另一組包括窩輪、各種受證監管嘅投資產品。每組頭三名可獲得合共14000元獎金。其實錢都唔重要，最好玩係十個得獎故事會改編做廣播劇，在港台第五台播放，重會登報紙。
嗱，炒輸咗（例如跟「細路仔」追「新世界」）同贏少咗（掛牌第一日沽領匯）嘅股民，唔使四圍搵人呻，不如作個古仔，同大家分享吓賺餐茶。記住，1月16號截止，報名表可以上www.eirc.hk下載。