一年將盡，九龍個邊有30幾年歷史嘅凱悅清拆結業，中環呢邊有40幾年嘅文華東方重新裝修。文華公關話畀華華知，今日上午11點，所有住客都會check-out清場，12點半就有個員工告別祝酒儀式，搭正下午1點，總經理傅宏卓就會鎖大門，正式開始為期8個月，耗資逾10億港元嘅裝修期。
今次改建，文華會將所有露台拆晒，改用玻璃幕牆（真係令人冇癮），房間數目由541間，減至503間，其中69間做套房，而地下商舖嘅間格亦都會改，希望提高實用率，咁租金都可以收多啲嘛！
中環人最關心嘅係酒店食肆，據知，改建後食肆數目不變，但原本喺25樓嘅Vong就會由一間新餐廳取代，而且重已經請到米芝連三星大廚PierreGagnaire坐鎮；另外亦會有一間新嘅一站式美容水療中心，最快明年8月底有得用，中環女郎以後就多一個減壓「勝地」可以去。
800員工另有安排
裝修8個月，咁班員工點算呢？800個員工當中，部份會安排去集團本地或海外嘅酒店，部份就會暫時調到母公司怡和集團幫手；文華話會盡量保留所有員工，唔會因為裝修而炒人。
其實今年酒店業大旺，有經驗者供不應求，置地間新文華同四季都要越洋挖角或者借將，文華又點會放走啲好夥計呢。
李華華