曾蔭權昨日飛上北京述職，華華記得今年3月10號，董建華原本應安排好上京，不過佢取消咗行程，下晝五點半宣布腳痛唔撈。華華當時正在佢間寶號東方海外嘅業績會，東方海外大概收到風，提前一日見記者，重趕及在董生宣布唔撈前答晒記者問題收工。
回歸以來，揸東方海外都幾發，股價由個幾炒到四十蚊，董建華莫講腳痛，打跛隻腳都唔使憂，不過航運業好似話前景麻麻，理由係船多貨少，特別係做貨櫃嘅，運費壓力尤其大。啲春江鴨今年就沽定航運股，上個禮拜五東方海外收26.75元，比較董生辭職當日34.5元足足跌咗兩成二。麥格理（上周寫馬世民時寫咗麥格里，係理至啱）話，要22蚊至係入市良機。
有人話，董生為人正直不偏私，佢做特首時一定唔會掂家族生意。東方海外當年股價大升，未知與此有冇關係？