特區政府嘅政改方案不能在立法會通過之後，政壇人士紛紛找尋死因，不過本欄以前講過，傳統左派對政改方案唔多鍾意，輸咗重好，搵死因做乜吖，你睇曾特首在上星期一、二，滿臉嚴肅，神情緊張，但到咗星期四會見傳媒高層嘅時候，據講十分輕鬆，笑容十足，可見輸咗重舒服，星期三凌晨上床，一定好好瞓，否則第二朝面對鏡頭之時，點會咁好精神？
餐廳Ｒ聽見《蘋果》寫過政改方案敗於四Ａ，問左丁山何謂四Ａ，左丁山其實冇睇過《蘋果》點寫，不過諗吓就知，論字母，Ａ排先過Ｂ，論考試，Ａ一定好過Ｂ，玩啤牌，揸住四條Ａ，勝算高到極。呢次民主派爭取普選時間表派確實係有四條Ａ噃，嗱，第一個Ａ就係AppleDaily《蘋果》極力鼓吹民主，力撐民主派，大大提高民主人士士氣；第二Ａ係Anson，嘩，陳四萬參加遊行，喺星期一截特首糊，請特首向北京爭取二○一二年直選，可講得話奇招迭出，搶佔道德高地，令神仙索綑綁民主派得更緊；第三個Ａ係Ａ-45，四十五條關注組嗰班大狀能言善道，令林瑞麟及保皇黨難以招架，第四個Ａ就係大主教Archbishop，大主教出聲，係有影響力㗎。上述講法，會有人認為過於簡單，抹殺其他人士嘅力量與貢獻，不過請各位阿哥阿姐包容，唔好駁古。加多第五個Ａ都得嘅，就係AlbertCheng，鄭大班幾乎忠義兩難全，俾老友曾特首極力遊說，不為所動，好難得啫。
撐住政改方案嘅有兩個大Ｂ，一個係Beijing，一個係Bowtie，已是雙拳難敵四掌，兩條Ｂ點砌得掂四條Ａ吖，更何況，一位親近政府人士講畀左丁山聽，來自北方嘅Ｂ哥或Ｂ哥代理人/代言人/傳話人，遊說時有意無意之間弄巧反拙，要香港嘅細Ｂ補飛，敗像早呈，即使加上一支來福槍（Rifle，即係RafaelHui），都射唔住陣腳也。