煲呔成日話民意企喺佢度，又話政改方案得到民意擁抱，大嚿陳偉業就「大」政府，選舉同公投先至最反映民意，你有種就解散立法會，到時投票再選，就知道民意究竟支持邊個喇，政府得個講字又唔做就係輸打贏要！
煲呔民望仍然領先
煲呔睇嚟唔係幾夠吉士，唔敢同大嚿晒冷賭一鋪，唔知係咪驚立法會一旦重選，唔單止踢唔走民主派，莫講話何秀蘭、黃成智返晒嚟，分分鐘連陳太都呼籲手袋黨退休舊部出嚟參選爭民主，令政改再一次被扑低，到時莫講話揚言「絕對唔會辭職」嘅肥龍，就連煲呔唔使腳痛都要黯然落台，因為《基本法》已經規定咗，解散立法會都唔掂，特首就要byebye。
其實政府又唔使咁冇信心，解散立法會政府都唔係冇着數，睇番港大民調，曾蔭權嘅評分長期喺六十五分以上，民主派得個余若薇掹車邊過六十分，跟住就嗰班議員只係得僅僅五十分左右。政黨嘅民望重衰，除咗大狀黨同職工盟過五十分，其餘都全部唔合格，加埋民主派曾經發生轉軚風波，話唔定會內訌。
強政勵治唔可以得個講字，煲呔又點可以因為驚咗班民主派，唔去解散立法會？八方希望，胡錦濤喺煲呔述職時，鼓勵吓佢解散立法會，證明吓強政勵治係堅嘅！
爆料熱線：29290000、27860099
報料傳真：26239278
報料電郵：[email protected]