張家輝和懷有身孕的關詠荷養了三隻狗，包括金毛尋回犬大脷、雪橇犬阿福和積羅素犬德仔。家輝表示雪橇犬阿福愛吃自己的糞便，不合衞生，故他特別加設私家狗廁所，牠們如廁後，菲傭即沖廁，問題就迎刃而解。
張家輝與即將臨盆的關詠荷家中養了三隻狗，分別是金毛尋回犬大脷、雪橇犬阿福和積羅素犬德仔。家輝夫婦倆喜歡住西貢，亦是為了令愛犬有多些活動空間。張家快將增添新成員，故特別重視寵物衞生，幸愛犬訓練有素，會自行到狗廁所解決大小便，然後菲傭替牠們沖廁。
為三隻愛犬設私家廁原來有原因，家輝解釋說：「阿福（雪橇犬）有個怪毛病，喜歡食番自己啲屎，鬧極都唔聽，有時重會收埋啲屎嚟食，有咗呢個廁所，佢哋屙咗喺廁盆，工人即刻沖廁，阿福就肯定食唔番自己啲屎啦！」家輝續說：「養狗要有公德心，如果放狗出街大小便，一定要善後。拖大狗出街就更應該戴口罩，以免咬傷途人。」
德仔破壞力強
家輝相當了解愛犬的脾性，他笑說：「最乖係大脷（金毛尋回犬），最曳係德仔（積羅素犬），如果冇人睇住佢，屋企啲木家具肯定俾佢咬爛晒，佢嘅破壞力好驚人。最熱情就係阿福（雪橇犬），見到人就會撲埋去，佢又唔知自己有幾大力，有時會嚇親人，所以有朋友嚟坐，我一定要隔離佢一陣。」
家輝指三隻狗都很溫馴，對主人很忠心，他說：「以前老婆未大肚，啲狗入埋我哋房一齊瞓，每朝早佢哋會舔醒我哋。德仔幾個月大抱返嚟養嘅時候，佢一緊張就會喺廳度屙尿，大脷真係好鬼蠢，見到又會跟住屙。阿福就唔知點解咁鬼好精力，成日周圍去探險。」
採訪：陳月媚 攝影：葉君海
