天王變賣保母車任揀$295,000起:<br>劉德華七座變四座黎明流動音樂廳

天王變賣保母車任揀$295,000起:
劉德華七座變四座黎明流動音樂廳

豐田Alphard七人車成為藝人出Show的必然座駕,咁究竟天王劉德華部車正啲,還是Leon黎明部座駕夠出位,一直都係不少車迷和Fans的問題;最近,我們發現到兩位天王不約而同將原有的超豪保母車TradeIn變賣,咁又點可以錯過機會,立刻坐上部車一嘗當天王的滋味呢!
記者、攝影:陳偉林
ImageGirl&Boy:Tiffany&Tommy(TheGroup)

劉德華一個人坐晒

首先睇睇劉德華呢部車,車廂嘅座椅全部用單色高級小牛皮縫製,軟滑又貼服,呢部車重有個特點,就係拆咗中排座椅,騰出更闊落的空間,車頂有10吋DVD屏幕,好明顯,劉德華都鍾意一邊坐車,一邊欣賞影碟。

■劉華的車廂尾排可左右獨立收摺起來,夢想跟偶像細語數星星,都不知幾浪漫。

■屬天王座駕的豐田Alphard,配備一台3.0公升V6引擎,用來逃避狗仔隊跟蹤都無問題。

型仔改裝

劉德華嘅保母車,車身就換上Racing鬼面罩連大包圍,原來佢都鍾意型仔改裝車喎,當然,呢部車都有兩段式(Sport同Comfort)電子懸掛調校,令轉彎抹角貼服又咬地,快車一樣可以避開記者嘅跟蹤。

■車廂有桃木修飾,不過劉德華應該未坐過司機位。

■兩旁趟門方便大堆記者蜂擁拍照和採訪時上落。

■劉德華鍾愛高級真皮座椅,真係好軟滑貼服喎。

黎明5.1聲道雙人影院

輪到睇睇黎明部黑色Alphard,唔……全個車廂都好原裝,保留住三排坐椅,而且車廂中間裝有DVDLCD顯示,加上全車雙皮椅,全部摺下的話,就成為一個只容納兩個觀眾的私人音樂廳。據知,黎明呢部Alphard雖然用了原裝日本機頭,但全車的音響已經改裝,加上劇院式的5.1聲道,睇戲肯定一流。為了一探音響系統有幾勁,我們不斷在車廂尋找後加的音響設備,但旁人笑笑,表示呢部車經專人安裝音響,全部內藏式設計,而且車廂頂安裝了多聲道用的揚聲器。

■黎明的豐田Alphard,中、後排可以組合成闊落的會客室,Fans跟偶像促膝詳談都得。

黎氏包圍設計

黎天王部車係日本本土的至Top版,加有Leon親自設計的改裝包圍配件,由於部車更屬後期Facelifed新版,重有一對勁白Xeon頭燈,重有,我哋又發現呢部車四輪係電子懸掛,有不同軟硬調校,加上隔音極好,簡直係個私人影院兼睡房。

■車廂頂備有原廠DVD屏幕,又有原廠後排獨立冷氣調校。

■前排椅背後置有原廠衣架,方便天王出Show掛衣用。

■前排之間另設有大型雙層式儲物匣,前端還備有活動天窗開關。

■兩層的大型首飾箱,還內藏間隔,唔知黎明用嚟放乜呢?

豐田AlphardMZGEdition檔案

引擎:2994ccV6DOHC
馬力:220ps/5800rpm
扭力:31.0kgm/4400rpm
傳動:4前速自動波,前輪驅動
懸掛:(前)麥花臣支柱(後)扭力連桿
制動:(前)透氣碟(後)碟式(ABS)
輪胎:245/45R18GoodyearEagleNCT5
尺碼:4800×1805×1935mm
軸距:2900mm
車重:約1850kg
平均耗油:8.9km/L(日本10.15模式)
車輛提供:富利堡汽車(28772700)

天王換同款車

佢哋兩個同時放車,咁又換乜車呢?咪又係新版Alphard,新版只係多咗6前速波箱,同可轉向式頭燈,同舊款分別唔係咁大。

打破保母車傳言

藝人的七人車,對一般人而言,非常神秘,要約他們的保母車拍照做採訪,比登月球更困難,所以流了很多傳言,例如某明星的車大肆改裝了,不合法呀,所以不能拍照、又或者車內設了密封式私人的密室(部車有無咁大?),怕人跟蹤呀……
今次看到兩位天王級的前任保母車,打破了這些傳言,原來沒有甚麼不合法的改裝,只是多了頂級音響,或拆去中排座椅。如果你有坐過Alphard,就知道Alphard比其他七人車多了一份Chauffuer的乘坐感。平治S-class或凌志LS430就有這種感覺,可惜車廂太細,換衫睡覺也不能,豐田Alphard不能說最好,但最接近。

記者:伍旋卓