「等到頸都長，先有幾日紅色假期，眨吓眼又過咗，幾時先放Lunch呀？點解放完假重多咗嘢做㗎？過多幾日就元旦，又撞正星期日，蝕咗畀老細㖭！」喂，你遊完魂未呀？一放長假就夜夜笙歌，日日瞓到黃朝白晏，日常作息亂晒大龍，甚至玩到元神都返唔到來。假期結束，你是否還能一如往常地開心返工？如果唔得，可能你已經患上假期症候群！
記者：盧家蕙
攝影：陳偉強
Model：Natalie@Salvador
可能持續一星期
據陳諾偉醫生表示，人體本應按照大自然的時間定律來正常作息，由於假期時人的情緒與精神都處於放鬆或是散漫的狀態，隨時玩到日夜顛倒、飲食不正常，一旦要回復到正常上班、上學的日子，很多人都會有心散、亢奮心情抽離唔到的情況，甚至還會出現無精打采、頭暈、憂鬱、焦慮等所謂的假期症候群（Post-VacationalSydrome）。
高危人士包括學生、打工仔、潛在抑鬱的人以及工作涉及思考性的人。假期結束後的第一天最為明顯，而通常會在二至三天左右消失，但也有的會持續長達一星期以上。
年輕上班族患者多
陳醫生說：「尤其是學生哥，過了十幾日長假、兩個月的快樂暑假後，突然要早起上學，心理抗拒感會非常明顯。不過，以往多出現於學生身上的假期症候群，現在已漸漸轉移到年輕上班族身上，主因是放縱過度和生活作息不正常。假日休閒娛樂愈來愈多，年輕上班族無不想把握時間狂歡。從星期五晚上開始一連串的唱K、飯局、雀局等，假日行程排得密密麻麻，就算不上班也常搞得身心俱疲，分分鐘重累過上班。」
假期愈長、玩得愈盡興，假期症候群的發生率也愈高；利用假期而出國外遊的人士亦要小心，由於外地的生活習慣、文化和時差的問題，回港時更易誘發此症。還有原先個性傾向懶散的人，或對環境適應不良的人，都是假期症候群的高危人士。
一返工徵狀逐樣來
如果你在假期結束去上班返學，比往常容易患有下列症狀的其中任何一項，咁你極有可能患上假期症候群。以目前臨床經驗來看，假期症候群的主要症狀有下列幾項，包括：上班時容易疲倦、注意力難以集中，變得善忘、感到頭暈、腸胃不適、心情煩躁，容易頭痛、情緒低落或憂鬱、早起時懶床、失眠，尤其是回到工作崗位前一天。以上徵狀，通常持續最多一星期，要避免，最有效當然係事前作好安排啦。
假前預防最有效
—學生應預留一定假期做功課，若然完全不顧，假後更難面對。
—戒掉假期時的暴飲暴食習慣。
—旅遊假期行程勿安排太緊湊，應多留一至兩天留港適應。
—假期最後一天，留在家裏輕鬆的過，調整心情。
5招搞掂假後症
第一招鼓勵自己
返工當日，起身對自己說「放完假返工要精神啲！」「我喜歡自己的工作」等說話。
第二招先找輕鬆工作做
第一天返工，先清潔枱面，做點輕鬆、毋須太多腦力的工作，慢慢適應工作節奏。
第三招重溫成就
開工前，回想一下工作上的成就感，例如被老細誇獎，鼓勵士氣。
第四招收工早點回家
收工梗有同事找吃喝玩樂，這樣只會把你假期症延後一天，不如早點返屋企放鬆心情吧。
第五招用點香薰
長假後的壓力，都是神經系統引起的症狀，香薰精油對此有幫助。返工前，可先以手帕沾點香薰精油，隨身攜帶，放鬆心情。
高危一族：唔放假重好
阿程
職業：大學學生
「放完長假通常個人會頹頹地，朝早鏟我都唔願起身返學。一諗起啲Assignment、Present逼埋身，點做得切呀？有時諗唔放假重好，起碼我唔會走咁多堂。」
樂仔
職業：中學老師
「學生、老師假期比較多，我就最怕學生玩到喪晒咁返學，上堂時心不在焉、趴晒係枱度聽書、唔交功課甚至詐病唔返學，搞到我都冇晒Mood喇！我唔可以比學生更頹，唔係大家只會攬住一齊頹落去。」
Ciny
職業：飲食業經理
「做得呢行就預咗少假期，人哋放假自己就日做夜做，諗起就心噏。難得有假期梗係要玩盡佢！不過放完之後更加唔想返工，個人謝咗大半，重要死撐住笑口噬噬返工，好鬼辛苦。」
