郭富城近排忙緊拍電影《父子》，佢前晚喺新城頒獎禮食白果兼冇出席，但係佢噚日特別出席喺銅鑼灣舉行嘅「慈善EP預購咭簽名會」，收到好多歌迷大包細包嘅禮物，城城開心之餘都反問啲歌迷：「做乜咁多禮物嘅？」
城城今年攞完傑青又拎埋金馬影帝，但喺音樂方面嘅成績麻麻，城城話：「頒獎禮對我嚟講係一切隨緣，𠵱家嘅我唔會太刻意去頒獎禮，而會做自己鍾意做嘅事，同埋等公司安排。」講到咁隨緣，城城係咪諗住有獎都唔攞呢？佢話：「睇公司安排啦，時間許可，而我又想嘅就出席，獎項嘅嘢我唔刻意追求嘅，反而追求quality（質素）。」
同Charlie鬥激
有指城城同楊采妮（Charlie）喺電影《父子》入面會有好激嘅場面，問城城係咪情慾場面？佢話：「大家睇咪知囉！我就覺得係Charlie入行最大嘅突破，我嘅角色就好粗魯。」
