蘋果日報慈善基金轄下嘅愛心基金委員會，每年都有四次大型撥款行動，資助社會服務機構推行一啲切合社會時勢需要嘅計劃。
資助14項計劃
委員會啱啱喺上周完成第四季度審批會議，通過撥款八十餘萬元，資助十四項服務計劃。
其中，保良局長者地區中心（觀塘東）嘅「兩老互關懷計劃」係獲撥款最多嘅計劃，逾十八萬元，計劃目的係透過舉辦模範長者夫妻選舉、出版夫妻相處之道書籍以及社區教育等，促進老夫婦之間嘅和諧關係。
大使都覺得呢個計劃好有意義，等公公婆婆學吓點樣「活到老、愛到老」，溫溫馨馨享受晚年生活。
至於第二撥款最多嘅係基督教豐盛職業訓練中心嘅「新丁實務計劃」，撥款十五萬元。計劃對象係一群離校待業嘅青少年，為佢哋提供汽車維修、剪髮、冷氣工程等職業技能訓練同埋升學就業輔導，掌握實戰經驗，增加競爭能力，亦都可以減低佢哋誤入歧途嘅機會，預計有九十名青少年受惠。
培訓待業青年
大使數數手指，計埋今次嘅撥款，今年蘋果基金已經撥咗超過四百三十萬元，資助七十項社會服務計劃，所以善長所捐嘅每分每毫，都係用得其所。
錯過咗今年申請時間嘅社會服務機構唔使失望，明年請早！如果想攞定申請表格，可以去到呢個網址下載：charity.atnext.com，或者致電：29908688查詢。
暖流熱線
電話：29908688
傳真：23702192
電郵：[email protected]
網址： http://www.charity.atnext.com