講起哲學，原來老友記餐廳R嘅乖仔喺英國攻讀哲學，攞完學士，再讀碩士，餐廳R都唔知乖仔讀書嘅詳情，聽見「哲學」一詞，已覺頭痛，英國啲學生讀完哲學，不少跟住讀法律，做大律師，或者從政，做政治家。記得傳奇大狀余叔韶就係先在牛津讀PPE（政治、哲學、經濟）嘅，佢在自傳《與法有緣》一書有詳細講述。喺牛津劍橋讀PPE，加上辯論學會嘅經歷，乃係搬入唐寧街十號之前嘅最佳資格。
好多人以為讀哲學之人多數係純書生。不識俗務，其實未必。「傳媒訓練」（mediatraining）高手M曾話畀左丁山聽，佐敦道嘉賓大廈（著名之醫生大廈）隔鄰有一間大廈，好似叫做新寶廣場，四樓有一間書屋，專賣人文學科書籍，且以哲學為主，書屋佔一層，臨窗有書桌茶几，畀好書之人飲茶睇書，十分清靜，高手M得閒就上去坐下，覺得成個人都輕鬆晒。高手M有所不知，此書屋由哲學F開辦，哲學F在六十年代師從唐君毅及一班新亞研究所老人家，離開大學教職之後，就獨創新路，講授儒釋道學說，用私人一己之力，辦成一間中國哲學專門學院，門下學生無數。本來呢啲私人教學機構，好難捱嘅啫，但哲學F以西方傳教士嘅精神，宣揚傳統學說，居然畀佢搞到有聲有色，創下奇蹟，在觀塘自置總部，佐敦道新寶廣場租咗兩層樓，一層做課室，一層做書屋，二三十萬銀租一個月，可算膽識過人，哲學F更在新加坡設立基金會，在肇慶買下面積數十畝嘅園林作學生進修之用，今年辦CEO修養訓練營，有幾十位企業CEO（來自新加坡、馬來西亞、香港）入營；股票界資深經紀P係哲學F學生，曾對左丁山講：「我哋日日講投資賺錢，跟咗F教授學佛經之後，先知道心靈嘅文化精神修養，先至係人生最大投資。」嗱，唔好笑哲學系學生呀，經紀P話聽哲學F講論語、六祖壇經、禪、企業文化、CEO精神修養，簡直係大享受。