臨近年底，行機水貨少到水盡鵝飛，唔止「機場」Sales搞到拍烏蠅，連網上NewsGroup友都將話題轉移到3G服務。好似近期有網絡商話要收取3G即時資訊費咁，就引來用家強烈不滿，部份已經被合約綁住嘅用戶，更話自己畀人「坤」，大歎唔抵㖭！
其實佢哋咁不滿，亦不難理解。今次徵收費用嘅3G資訊服務，主要係針對時事新聞，月費$18，可無限任睇；至於另一種以每日計嘅方式則為$2。有用家好嬲話：「以前一向都免費㗎啦！𠵱家連最基本嘅新聞資訊都收$18月費，咁玩3G重有乜意思？」有用家更埋怨畀人「坤」：「啱啱先簽咗約，上埋台，但毫無先兆之下突然收取新聞資訊費用，真係唔抵！」
身為3G用家，當然希望享有絕大部份免費資訊；網絡商要收取費用唔緊要，不過最好喺客簽約前講明會收費喇！
記者：尹謹基