夢幻王國迪士尼同遊戲界台柱SQUAREENIX溝埋嘅成品─《KingdomHearts》，最新推出第二集，雖然趕唔切香港迪士尼開幕賀一賀佢，不過第二集集合晒兩間大廠之大成，人氣主角齊齊登場，仍然係近期最有睇頭之必玩大作！
記者：許福合
講到人物，兩間廠人氣度都相當高，迪士尼除咗唐老鴨、高飛狗等著名人物外，重會有花木蘭、獅子王出場，而SQUAREENIX亦唔弱，多名《FF》主角都會現身，而遊戲主角更係《FF》人氣度相當高嘅SORA，一隻遊戲就可見到各大明星，都幾抵玩！
唐老鴨高飛狗結伴冒險
今集玩法仍以RPG為主，喺上集曾經出過嘅10個版圖，大多得到保留，而且經過重新包裝，畫面同上集都有好大分別，另外，當然唔少得全新世界，整體內容比前作更為豐富！雖然遊戲人物數量眾多，又各有特色，不過兩大廠人物各自都會負起唔同工作，玩家操作嘅SORA冒險時，可以同迪士尼人物結伴甚至組隊作戰，遊戲一開始，主角SORA就係同唐老鴨、高飛狗一齊被傳送至另一世界，同時，各《FF》角色就當起小天使，會不時現身出來幫助玩家解決難題，呢個設計對熟悉各個角色嘅玩家就會非常過癮，事關編排上相當有心思，會挑選番有心得嘅角色出來教路，玩落自然會更投入！
結合魔法以一敵眾
今集仍跳不出RPG框框，都係累積經驗升級，除咗人設夠噱頭外，亦加入新系統，筆者覺得最好用係變身系統，可增加各種能力，最正重係會換上平時不同衣服，感覺多變化好大，不過呢招並唔易出，要「DRIVE」累積到滿先可以借助隊友力量，變身為不同姿態，當變成以魔法為主時，會轉為魔法師模樣！魔法更係今集殺着，只要時機用得正確，以一敵眾絕對不難，基本分為磁石同反擊系，磁石可以將敵人吸住攻擊，面對一班敵人就最啱用，而反擊就係可以反射敵人攻擊，不過筆者試過對Boss級敵人係無效，另外，網上亦有人報料話係有隱藏魔法，學多幾招變化就更大！
攻擊多變加入召喚
除咗魔法外，戰鬥時重有好多變化，最常用係合體技，因為SORA冒險途中，都有迪士尼人物作伴，畫面右下角就可見到當時隊伍狀態，當有足夠MP時，就可以選擇發動合體技，例如SORA同唐老鴨會一齊攻擊，雖然合體技攻力唔及魔法，不過因為較為彈性，可以經常使用，另外今集更加入召喚系統，可以呼叫迪士尼人物來助陣，好似史迪仔同雞丁，連戰鬥模式都相當特別，淨係睇都過癮。
延續上集人物擔正
第一集賣個滿堂紅，第二集似乎都係打算食住條水，仍然係以兩大廠人物擔頭，無咗第一集嗰種新鮮感，介面方面變化唔大，可以話易上手，亦可以話係無咩新意，不過視點方面設計得比上集好，好多時都識得追住攻擊方向，應唔怕玩到頭暈！玩過遊戲後，最有印象唔係幾名人氣角色，而係出招時所配合嘅視覺效果，閃光魔法橫飛嘅場面，都比上集來得更震撼。
玩家意見
Anson
角色有趣
喺遊戲裏面可以見番咁多老朋友，有趣角色，玩嘅時候特別有親切感。
Jimmy
魔法場面佳
今集使用魔法時，畫面好靚同美觀，主角間中又可以變身，玩落唔覺得單調。
遊戲資料
開發廠商：SQUAREENIX
主機：PS2
類型：角色扮演
遊戲人數：1人
售價：$398
SONY（23452966）
