今屆同上屆超級女聲冠軍李宇春、安又琪，同《殘酷一叮》叮王莫凱謙前晚平安夜喺中環皇后像廣場，同市民倒數歡度聖誕節，大會安排兩位超女同莫凱謙上台唱聖誕歌《WewishyouaMerryChristmas》慶祝，不過唔知係咪兩位超女係內地人嘅關係，淨係識唱「WewishyouaMerryChristmas」呢句歌詞，唱到其他歌詞時只能口啞啞，反而叮王莫凱謙就由頭唱到尾，完全冇失威。
自己歌照甩
其後大會安排李宇春清唱佢自己嘅歌搞氣氛，但可能佢冇預備，所以連自己歌嘅歌詞都唔記得，惟有攞住個咪叫專程嚟香港捧佢場嘅fans唱。而叮王莫凱謙好似唔多識兩個超女，但又見到佢哋有咁多fans撐場，所以表情有啲奇怪。
首次喺香港過聖誕節嘅李宇春話香港聖誕氣氛好濃厚，佢都收咗唔少fans送嘅聖誕禮物包括公仔、頸鏈等。安又琪話出席完新城頒獎禮後，都會逗留香港四圍遊覽同購物。