今個聖誕檔，周圍都見人頭湧湧！開心在旺丁又旺財，感覺整體市況真係好咗！DVD場嗰邊亦罕見出現雙料逼爆情況，人流逼爆、買碟過節固然例牌，更強者係唔計韓版、美版，一個星期內有成十幾隻港版3區殺落場！真係貨架都俾佢哋逼爆！
記者、攝影：朱崇德
咁多碟？買邊隻好？除按個人喜嗜，重可以留意「碟場熱賣」情報！現知杜琪峰嘅《黑社會》最好賣，緊追其後嘅重有宮崎駿《哈爾移動城堡》，兩張碟都係有實力兼玩「名牌」效應，唔大收就奇！今個星期勁出十幾隻「3區」固然開心，不過下星期碟場將勁吹淡風，未有香港發行公布會推碟，所以大家買碟時唔使咁猴擒，留番一手，費事下星期行碟舖時冇嘢睇吖！
明爭暗奪 爭龍頭
聽到話出《黑社會》都真係幾驚訝！10月底上戲院，個零月就話上DVD貨架！今次《黑》共分單碟齋戲嘅普通版（$75），同雙DVD嘅導演特別版（$100），多出嚟嗰隻碟係全Bonus，內容主要係杜Sir同演員專訪及製作特輯，所講都係圍繞拍片理念同講解背後意識，杜Sir迷冇理由唔睇！
《黑》其實係一個圍繞梁家輝同任達華爭做黑幫龍頭的故事！感覺同一般江湖片最大唔同處，係佢並冇用力渲染暴力、血腥（不過都列作III級），就連最常見《古惑仔》式大場景晒馬場面都唔用！簡潔地描寫二人耍弄種種明爭暗奪手段。
好人性 感受深
梁飾的大D是一個劍拔弩張的黑社會頭目，任飾的阿樂相反是一個暗耍辣招的「無聲狗」！全戲主線雖圍着兩人走，側寫樓上一班「老叔父」貪贓受賄，為權力私利各自歸邊；樓下一班「當紮」小頭目，為上位而兩邊游走，感覺既人性又真實！如將劇情放諸商業社會上，回應番英文片名（Election:選舉），都令人感受好深！
彩蛋睇《黑2》預告
除任、梁二大主角，戲中的配角亦相當搶眼，王天林飾的「叔父」，說話精警又有台型，真係連「肚腩都會做戲」！另較喜歡的是林家棟所飾的東莞仔，戲份唔多但相當入戲，嗰股狠！真係撈偏門嘅材料！
另外一提大家，導演特別版嘅Disc2有「彩蛋」，隱藏片段收藏在預告片一欄內，只要按「↑」及「Enter」就會睇到，內容是06年初上畫的《黑社會2:以和為貴》預告片，普通話配音加中文字幕，必睇！
歐陸風味 魔幻愛情
宮崎駿已經可算是動畫中的名牌，《哈爾移動城堡》今年復活節上畫、本周尾出碟，雖然見街幾日，碟片累積銷數雖然對《黑》有所不及，不過走勢亦一樣凌厲！
《哈爾移動城堡》（$123）同宮氏過往的作品最不同處，係佢是首隻非原創，並改編自英國名女作家戴安娜．韋恩．鍾斯的故事；動畫帶有濃重的歐陸風格，據知作畫前，GHIBLI工作室人員曾認真地到德、法等地實地取景；故事內容亦同過往作品不同，例如《天空之城》及《千與千尋》等名作，故事每章每節都會散見一層又一層的隱藏寓意，《哈》就好像少了這種深層的寓意，感覺是較直線發展及展露人性的反省，始終東、西方人思考模式不同，表達的感覺亦有所不同！
跟魔物展開旅程
故事講述18歲少女蘇菲被荒野女巫的魔咒變成了90歲婆婆，並在偶然下闖入充滿機關的魔法移動城堡；裏面撞上了魔法師哈爾，他英俊迷人，擁有不可思議法力，但傳聞他專吃年輕美女的心。蘇菲在城堡住下來，與哈爾的小徒弟馬克、火之惡魔卡西火和稻草人，展開了魔幻的同居生活，並逐漸走入了哈爾不為人知的奇幻世界，還發現自己也擁有一股神秘的巨大力量。
今次《哈》一樣採用了雙碟版，Disc1電影、Disc2特別收錄，除大部份是製作人員專訪外，最正是講解今次《哈》使用了大量電腦動畫的介紹，想知點樣將一張平面圖變為一座移動城堡，玩「Flash」及搞電腦動畫者絕對不可不睇！
