北泰（2339）月頭創出2.625元1年新高後，呢期回緊氣，再跌有得諗。北泰主打產品係汽車制動蹄，呢類產品特點係，唔理一手定二手車，都要用到，兼且產品消耗性大，加埋北泰又係祖國數一數二大嘅製造商，呢期又新研發複合摩擦材料制動蹄，進一步鞏固佢嘅優勢。所以，整體汽車市場唔掂檔，但北泰有point。
最新06年度中期，北泰純利就增長37%到1.73億（人仔．下同），成績表講明一切。北泰06年下半年業績，係咁易同上半年睇齊，全年度純利3.46億銀，已經有四分一番，預期PE重係7倍。再講，北泰主打原料鋼材，呢期回軟，生產成本輕咗，有機會提升下半年純利，預期PE有機會見6字頭。北泰月頭以嚟，似乎造緊個下降楔形，呢期再有調整，吼住2.25元兜轉，股價約略穿1年新高見2.65元，回報18%，跌穿1年上升支持2.15元走人，抵博。
世城未炒過龍
世城（355）最近個幾星期整咗個三角形，將破未破，嚟緊呢個月，留意長短棍，又講兩點：第一，上星期尾，濠賭股及酒店股發力，似係炒假期效應，照計世城系內最有條件係富豪（078），但呢期世城lead住嚟升，況且世城現價（9.7仙）相對NAV0.12元重有輕微折讓，未炒過龍，寧揀強勢股。第二，世城11月尾公布5送1紅輪，嚟緊星期四（29日）係除權前最後一個交易日，有甜品送，先食甜品。呢勻世城所送紅輪，每單位可兌換1股正股，換股價係0.1元，嚟緊1月6號股東特別大會通過後，20號就可以trade，留意隻輪同正股互為效應。
錢雋