煲呔曾上個禮拜三剛主持開幕嘅機場亞洲國際博覽館，噚日舉辦咗第一個大型活動，就係聖誕前夕嘅萬人祈禱會，一齊喺赤鱲角參加崇拜，除咗牧師講道，重有小朋友扮成天使表演。雖然山長水遠，但係都有唔少名人出現，包括近年積極參與教會活動嘅新鴻基地產副主席郭炳江，以及兩位同宗：滙豐亞太區主席鄭海泉及港交所上市委員會主席鄭慕智，兩位鄭生以前曾經喺立法局共事，原來都有共同信仰。
高官方面噚日就見到有馬時亨，肥仔馬受浸咗兩年，算係近年較活躍嘅基督徒問責官員。其實環境運輸及工務局局長廖秀冬、政制事務局局長林瑞麟及保安局局長李少光，都係基督徒，今年五月呢四位高官都有出席兩場萬人祈禱大會。
爆料熱線：29290000、27860099
報料傳真：26239278
報料電郵：[email protected]